يرضي مين ده

العبيط اهو اعتقد ان العبيط الوحيد في الموضوع هو انا امبارح كنا ع الغدا احمد طلب مني اناوله كوباية الميه... مسمعتش ماما عادت الكلام تاني: ادي لاخوك يشرب قمت ناولتها هي الميه بالرغم انها قاعدة في ناحية تانيه اخدت وصلة من الزعيق ع التوهان اللي انا فيه افتكرت ساعتها اغنيه شادية ابويا يقوللي اعملي قهوة اعمله شاي و اديه لامي بس يابختها هي سمعته و هو بيطلب بس الامر اختلط عليها ....انا بقي من التوهان معدتش بسمع و لاباخد بالي من اساسه ******** بعمل شاي و انا ببتسم بلبس هدومي و انا مبسوطة بشتغل و انا بضحك لما بفتكر حاجات بتقولهالي شيما بدأت تلمح اني خلاص بدأت افقد عقلي و ان الناس هتقول عليه هبله عشان هي مش فاهمة ايه اللي بيضحكني طب و هم مالهم

ما فيكيش و لا غلطة

"اكيد فيه"

ليس الحب ان نحب من بلا عيوب

لكن ان نرضي بعيوب من نحب

شك

في قلبي شك لا يبطل ايمانه

يرد عليه عقلي ويحك لا تكن من الممترين

فان القلوب ما بين اصابع الرحمن

يقلبها كيف يشاء

و ها قد شاء

فانفض عن ثناياك شكوكك

و اسأل الله التثبيت

****

هل تعرف اني قد اضحي ما بيني و بين الكفر قيد انملة

نعم كنت سأكفر

كنت سأكفر بقصائد عشت علي كلماتها

فهؤلاء الشعراء المجانين يجب ان يقتص منهم عما فعلوه بي

جنون .. جنون .. قد عشت به

ها قد طالت أحلام غفوي

و ها قد اقترب الغسق

وجب علي الاستيقاظ

كم كرهت ان استيقظ

فتحت عيني

و لقيت حلمي مجسدا امامي

بكل ما قد تمنيته

هو

مجنونا

شاعرا

فاتنا

حنونا

مغرورا حبتين

*****

استحلفك ان ترفق بي

فما لي خبرة بالعشق

و ليس لي الا قلبا واحدا

فان كسر

اني لي بغيره

و اني لي ان اغفو بعدها

مديتوا ايدكم بالسلام و برضه مش عاجبنا

مش عارفة ليه بتخنق من اي راجل يمد ايده بالسلام

بالرغم ان الموضوع بدأ معايا بالبعد عن الشبهات علي اساس القول اللي بيحرم تلامس الايدي ما بين الرجال و النساء الا اني بعد كده من قلة سلامتي علي الناس بدأت احس ان مجرد السلام حميمية في العلاقة لا يستحقها من هب و دب

لما ادخل مكان جديد بسلم علي الناس بايماءة من رأسي و ابتسامة و بضايق جدا من اللي يمد ايده لاني ساعتها ساضطر امد ايدي منعا للاحراج

و اللي بيضايقني اكتر انه يسلم عليكي زي مابيسلم علي واحد صاحبه و يبقي مش هاين عليه يسيب ايد الواحدة ببقي هاين عليه اقطعها و اسيبهاله يمكن تنفعه

*******

لو مديت ايديه و سلمت عليك يا ريت تعرف انك من الناس اللي بستريحلها في حياتي

بس نصحيه اذا قابلتني اوعي تبدأ بمد الايد

هيفا

احد الاصدقاء صرح ان نساء البلاستيك كهيفاء وهبي لا يثرن ادني اهتمامه

في رأيي ان هيفا مش في دماغها اصلا تثير اهتمام اي حد بقدر ما تريد اثارة اشياء اخري

الي السادة الشرفاء من ابناء مصر

This message is not flagged. Date: Fri, 26 May 2006 01:16:52 -0700 (PDT) From: ............................................................ Subject: الي السادة الشرفاء من ابناء مصر To: info@masrelyoum.com

السلام عليكم و رحمة الله السادة القضاة ارسل لكم دعمي الكامل لمطلبكم العادل الداعي لاستقلال القضاء لقد رأينا فيكم املا لنا و بصيص من النور بعد ان ضاقت مصرعلينا بما رحبت و باتت الهجرة هي السبيل الوحيد للعيش بكرامة الان ليس لنا حجة سنجاهد معكم حتي تتحرروا انتم اليوم و تتحرر الجامعات غدا و عن قريب ينال الشعب حريته لن نهرب فالبلد بلدنا و اللي مش عاجبه يورينا عرض اكتافه حفظكم الله للوطن

009749001951

باقى من الزمن ساعات على وقفه القضاة المنتظرة يوم 25 مايو ولذلك تدعوك المنظمة الأفرومصرية لحقوق الانسان والتنمية وحركة شايفنكم للمواقبة الشعبية كل مواطنى مصر للتضامن مع القضاة،والمطالبة باستقلال السلطة القضائية ،الذى يعنى أول خطوه فى طريق العدل والديموقرطية .يوم الخميس القادم هو يوم كل المصريين فلا تتوقع أن صوتك "مش هيغير كتير" ولا تتخيل أن "مفيش فايدة" كل ما عليك أن تدركة إنك مواطن مصرى،لك حقوق مسلوبة والحفاظ عليها يعنى "مطالبتك بالعدل" والتعبيرعن رأيك بحرية يعنى "مطالبتك بالديمقراطية" فهيا بنا نجعل شعارنا جميعا "معاً من أجل العدل والحرية"،استقوى بينا وقوينا بيك وضم صوتك لأصواتنا

وعبر عن رأيك من خلال الاتصال بالرقم

009749001951

او من خلال موقعنا الألكترونى

(نعتذر عن عدم وجود أى رقم أرضى لأستقبال مكالمتكم،لأن الشركات المصرية رفضت التعاون معنا

حركة شايفنكم نظمت أيضاً حملة اعلانية فى عدد من القنوات العربية والجرائد المصرية لحث كل المصريين على التضامن مع القضاه.. فتذكر إن هدفنا وهدفك واحد وهو "تغيير النهارده ورسم بكره زى ما إحنا عايزين"فلا تتردد وشاركنا برأيك بأى وسيلة .. سعر دقيقه المكالمه "3 جنيه مصرى"

السكر ايه

المشهد الاول : مكتب واسع مليان ناس بتشتغل

دكتورة ممكن اقول لحكمت تعملي شاي

اه طبعا ..استني انا اقولها... سكرك ايه

ربع معلقة سكر

همهمات استهجان من كل اللي قاعدين

ايه ..طب متشربيه من غير سكر

لا انا بستطعمه كده

الناس كلها بتشربه بمعلقتين و بعدين مش هتعرف تحسب الربع ملعقة

طب خليها تعمله بنص ملعقة

****

المشهد التاني: لقاءعائلي عند عمة من العمات او خالة من الخالات

نعمل شاي يا جماعة

الكل: ياريت

طب السكر ايه

انا ربع ملعقة

اصوات كتير بتتكلم: ليه انت فيك حاجة" رفيعة يعني" عشان تتقللي السكر

حد تاني: انت عاملة رجيم و لا ايه

حد تالت: دكتورة بقي

****

المشهد الاخير : في اي حتة بعد كده

سكرك ايه

انا مبشربش شاي

يا حرام ليه انت خايفة من الكافيين

يا عالم زهتوقني

جزمة حريمي

مش عارفة انا محرجة اكلم في الموضوع بس خلاص مش قادرة استحمل الحكاية ببساطة ان الجزم انعدمت في البلد الجزم هي المصطلح اللي يطلق علي الحاجة اللي بتلبس في الرجلين و المفروض ان عمرها الافتراضي يعدي الستة اشهر لو مش جزمة بجد او تعدي معاك السنتين لو جزمة بنت جزمة ده كان زمان و زمان ده من اربع سنين

****

من اربع سنين كنت بتبسط كتير لما انزل اشتري جزمة بس الحالة اتغيرت بقي الموضوع ده بيكأبني لاني عارفة اللي هيحصل عارفة ان الجزمة هيحصلها حاجة في اول اسبوع و لو حظي حلو هتعمر شهر مش فارق ان كانت براند او مش براند كله زي بعضه واحد من الشغالين في محل توكيل ودتله جزمة من الجزم بعد عشر ايام بعد امنفصل نعلها و كان رده انها شتوي ماينفعش تتلبس في الصيف و بعدين دي كمان جزمة اسكندراني مش متعودة ع الحر اللي عندنا

****

بوت.. سابو.. جزمة كعب عالي ...كعب واطي.. كله زي بعضه مابيعمرش جربت كل محلات البلد و مافيش فايدة هيجيلي يوم و ماليقيش حد اشتري منه ... لما اشتكيت لواحد من اصحاب المحلات قاللي ما هو لازم عشان تشتري غيرها بيقولها بهزار طبعا

****

اخواتي بقوا يتلامزوا علي ويبصولي اصل انا اللي مش بيعشلي جزم اختي الصغيرة قالتلي ان ممكن نيتي بتبقي وحشة طب انا مستعدة اصلح نيتي بس يعيشوا

****

بدأت افقد الثقة في نفسي.. في مشيتي بقعد ابص لرجليه و أقول يا ربي يمكن رجلي اللي مش مظبوطة بس لا فيه فلات فوت و لا حتي عضمة طالعة يمين و لا شمال طب فين الغلط

****

هذا بمناسبه السابو الجديد اللي اتقطع النهاردة في اول لبسة ع بعد تلات شوارع من بيتنا

واحدة معرفهاش

تعجبني نظرة الاعتزازالمطلة من عينيك

و زمة شفتيك قرفا

ارفعي جبينك اكثر و أكثر

فلولا الخوف ما حشدوا جنودهم

و تحصنوا خلف المتاريس

***

تعالت رأسك فوق رؤسهم

عينيك تنظر للسماء و هم ينظرون للارض

حلقي بعينيك بعيدا

فلولا الجزع ما خلعوا ستراتهم و ارتدوا ملابس العامة

الاهلي و الزمالك

فجأة عرفت من ساعتين ان الماتش النهاردة

كان بابا و اخويا باستنوا الماتش قبليه باسبوع و يحضروله القعده و اللمه

دلوقت مافيش حد ليه نفس

و انا كمان ماليش نفس

حد ليه نفس

شاي بالنعناع

اتقابلنا قبل كده

صحيح

كانت ظروف صعبة

...............................

انا حتي عملتلك شاي يوميها صراحة مش فاكر اصلي شربت شاي كتير اوي الايام دي

****

ليه مش فاكر دا كان حتي شاي بالنعناع و كان يوم جمعة

****

فاكرة كل الناس اللي قابلتهم الايام دي: سو بسيجارتها الطويلة الرفيعة و شرين و البواب اللي جه يصلح الكهرباء بعد مفرقعت

و بعدين بعته يشتري بصل عشان الغدا فاكرة عمرو و البنت اللي معاه اللي قابلتهم ع السلم و انا نازلة فاكرة عم شرين اللي روحنا معاه فاكرة الشارع و الطريق دايما بفتكر الايام الصعبة

****

بالرغم من نسياني الدائم لكل الاشخاص و الاماكن مما حدا أحد زملائي انه يقوللي انت عايزة تركبي رامتين two RAM chips الا انني اذكر تلك الايام جيدا بكل شخوصها و اماكنها

أذكر دموعي يوم الخميس و ضحكاتنا يوم الجمعة

لا أعرف لما يجتمع البكاء مع الضحك هذه الايام

لعلها السلوي

****

الله يرحمك يا أحمد

حق التظاهر و تامر

لا اعرف سببا يجعل مجموعة من المصريين تتظاهر من اجل تامر حسني و نحن في هذه الايام

لا اعرف لما لم يوجه لهم الأمن التهم الجنهمية الخاصة باعاقة حركة المواصلات او تجهمر اكثر من خمسة افراد في مكان عام

ام ان هذه التهم مفصلة فقط ليرتديها من يهتمون فعلا بهموم الوطن

تفرغ الامن لقمع المتظاهرين المعترضه علي محاكمة شيخين من شيوخ القضاء و ترك مجموعة من الهايفين تتظاهر من اجل براءة احدهم من جريمة تزوير مدمغة

برغم ايماني ان كل واحد ينام علي اي جنب هو عايزه لذا فاني لست ضد ان تتظاهر حتي جمعيات حماية الكلاب الضالة اي وقت تشاء لكن اليس القانون الذي قبض بمقتضاه علي المتضامين مع القضاه هو نفسة الذي ترك 300 مصري يتظاهرون من أجل مطرب

فكرت في الاسباب فلم أجد الا انه لا توجد اي نوع من العداوة بين الامن و اغاني تامر ربما لان الرجل من انصار قوم و اقف و حط ايدك ورا ضهرك

لماذا يصيبهم الخرس عندما تظهر العين الحمرا؟

افرجوا عن مصر

الصورة نقلا عن عشرينات

في بيتنا عاطل

من طلب العلا سهر الليالي من جد وجد من زرع حصد و غيرها من المقولات التي تحض علي الجد و الاجتهاد قد ربانا اباؤنا عليها المهم ذاكرنا و نجحنا و دخلنا أحسن كليات و المفروض انه بعد كده نجني هذا المسمي العلا اكتشفنا انه كائن خرافي لا يتواجد الا في الاساطير الثقيلة الدم خمس سنوات من البعد في مدينة مازلت تتوقع الحرب كما كان يصفها مدينة كئيبة* تشم فيها رائحة البارود عشرساعات من السفر الاسبوعي ليري اهله فقط لبضع ساعات بهدلة و سهر و اخيرا تخرج مهندس بترول قد الدنيا او هكذا كنا نظن كنا نظن ايضا ان العواطليه ناس تستاهل اللي بيجرالها ربما لانها شخصيات غير جادة لا تستحق العمل اكتشفت انك لتكون عاطلا يجب ان تستحق أم اسودت الدنيا في عينيها و أب اعتقد انه قام بما ينبغي عمله كبر و علم و صرف و كورة و قاله مايلعبش ذاكر أحسن يا بني الساعة دي هتندم عليها

**********

لو كان سابه يلعب كورة كان وصل كان زمانه لاعب في نادي انبي متعين** في وظيفة قد الدنيا بالاعدادية كان زمانه معاه رقم الوزير كان كمان رد علينا لما جينا نكلمه في البيت بيتك زي ما رد علي عمرو زكي سعادتك انا عايز احترف برة و طبغا سعادته مافيش حاجة وراه غيره

***********

يابني احلق دقنك لما اشتغل

***********

الساعة 12 اصحي بقي

اصحي اعمل ايه

*******************************************************

* السويس

** الدسوقي و زكي

German citizenship ......Fuckin' ur pitchy mother

اتلهي 1

مهداة للسيدة نوال زينب

و ياريت بلاها السعداوي

اتلهي

يا عم احنا في ايه و لا في ايه

عن الدواء نتكلم

أثارني مقال قرأته عن فساد العبادي "رئيس الشركة القابضة للمصل واللقاح" و فتح شهيتي للكتابه عن الادوية والفساد و انشأت بوستا جديدا و حفظته كمسودة لحين تجميع المواد التي سوف اكتب منها

بدأت البحث في الجوجل لكني لم أجد شيئا فقط موضوعات عن فساد قطاع الصحة العراقي

اعتصرت مخي

تذكرت مهزلة تسجيل الادوية و لمن تخضع و مأساة الفياجرا

بس لسوء الحظ نسيت لمن تخضع

تذكرت اشياء عن ثروت باسيلي و حبسه بس للاسف نسيت كان محبوس ليه

تذكرت حكايات أخري عن رؤساء مجالس ادارة شركات الادوية و ازاي بيبدلوا مواقعهم في لعبة الكراسي الموسيقية

بس للاسف نسيت مين بدل مكان مين

عدي عليه برضه ماساة شركة سيد و اللي بيعملوا فيها رئيس مجلس ادارتها قبل حتي موضوع البيع ده ما يجي و ازاي محدش بيقوله لا

تذكرت انه موضوع مشتقات الدم المغشوشة ده معروف مين زمان بس نسيت ليه مكناش بنكلم

-----------

الو ازيك

عامل ايه

و الله انت كمان وحشتني

....

......

....

انت كنت قولتلي قبل كده ثروت باسيلي اتحبس ليه

مش فاكر

طب ازي مصطفي سلملي عليه

سلام

------------

جايه النهارده و مش فاكرة حاجه و كمان سنتين العبادي هيمسك ممكن وزارة الصحة لشعب ذّاكراته اقصر من ذاكرة الاسماك

-------------

أه افتكرت ...... شريط الكيتوفان باتنين جنيه و نصف

قوم يا مصري

يا شعب مذلول و دلدول و مش فالح غير فى الكلام و الهتافات و تفريغ الشحنات على صفحات الانترنت ... قوم يا خانع يا خاضع يا خرنج من قعدتك على القهاوى و على الكراسى قدام الكمبيوتر قوم و قول للحاكم بتاعك إنتا ظالم و كفياك ظلم لحد كده قوم يا اللى بتغنى إخترناك و زفتناك رضيتم بالخنوع و العجز و بقيت زى القوادين بتصهين على الدعارة اللى شايفها عينيى عينيك و شايف الحاكم بتاعك نازل إغتصاب فى بلدك و بلدك بتصرخ و بتستغيث بيك و إنتا إبنها و برضه عامل نفسك مش شايف و لا كأن اللى بيغتصب بلدك هو برضه اللى بيغتصبك و بيديك على قفاك فى الرايحه و الجايه و واضح إنك خلاص إتكيفت و عاوز كمان ... إتفو عليك ما طلعتش من صلب أحمس و لا عرابى و لا الرجاله فى ثورة 19 ... طلعت إبن حرام و لقيط

تعليق لنمر من ورق في عشرينات

بحبك بأعلي صوتي و ألعنك برضه ع الملا بحب فيك زرعك و نيلك و رملك و ألعن فيكي ناسك اللي صابرين ع البلا

Jano

جانو بحبك بجد بالرغم انك السبب في طناش مامتك ليه

باباك معرفش يعملها

مشتاقة للايام اللي كنت ببات معاها

علي سريرها اللي عرضه متر واحد

بس كان بيقضينا

مع اني محبش انام جنب حد مشتاقة لمكالمتها ليه 3 مرات في اليوم و احنا لسه سايبين بعض من شويه

حتي و هي في شهر العسل

مشتاقه لصوتها لما كان بيوطي لما اكلمها في السياسة و تقولي

وطي صوتك دول بيتصنتوا ع التليفون

و لما كانت بتضحك لما أقولها أزاي و احدة زي تصاحب واحدة مخها فاضي زيك

مشتاقة لشكوتها اللي كنت بفكر اسيبها عشانها

مشتاقة لخروجات زمان انا و هي وساعات باباك كان بيجي معانا

بستني مكالمتها يوم الاربع لما اتكلمني و انا في الشغل و تقولي انا مستنياكي علي الغدا

انا سيبتلك انا و ليلو"جوزها" نصيبك

جانو انت ليه بترضيش تخليها ترد علي تليفوناتي

الاعتياد عليك

فكرة الاعتياد عليك تصيبني بالقلق

فهي قمة المشاعر داخلي

سيجارتك

لا اعرف لماذا يأخذني الغضب عندما يشعل أحدهم سيجارة و انا موجودة في نفس الغرفة اشعلها حربا شعواء عندما يتمادي في التدخين و لا يبادر معتذرا و يطفئ سيجارته لا أعرف لما يتبدل هذا عندما تنفث في وجهي دخانك استنشقه املأ رئتى ربما لانه هواء تنفسته حتي و ان حمل جزيئات من القطران

*****************

مبضايقش برضه من دخان سجاير بنات قرايبي ....يمكن عشان بحبهم

الثورة من مصلحة النظام

البلد ضاعت وراحت في داهية وهيحصل فيها ثورة، لكنني مطمئن لأنهم بعد أن يبيعوا كل شيء ستأتي الثورة الجديدة وتعيد تأميم كل ما باعوه ويعود القطاع العام مرة أخري

نائب وطني محترم

نقلا عن المصري اليوم

***************************

بعد ان خربت البلد و الظاهر ماعدوش لاقيين حاجه يسرقوها هيأمموها و بعدين يسرقوها تاني

و يأمموها و يرجوعوا يسرقوها تالت و يديني و يديك طول العمر

نروح من غير هدوم

ماما

ايوة

ممكن اطلب طلب

؟

كنت عايزة لما يعملوا اعتصام في ميدان المحافظة اروح معاهم

ايه

اعتصام

هو مافيش رجالة في البلد

اكيد فيه

انت عايزه يقطعولك هدومك

هدوم ايه بس اللي يقطعوها

ولا يعملوا فيكي حاجة وحشه

حاجة ايه بس

************************

انا حصلي 8 حوادث تحرش من غير مظاهرات و مش هتفرق لو بقوا 9

و ان كان ع الهدوم اللي هتتقطع

نروح من غير هدوم

الطظ

حول نتائج البحث عن ارتباط الطظ بمصر بواسطة محرك الجوجل

حوالي 856 لـ طظ مصر

حوالي 232 لـ طظ الاخوان مصر

حوالي 379 لـ طظ المرشد مصر

حوالي 723 لـ طظ الحكومة مصر

حوالي 637 لـ طظ مبارك مصر

*************

تعقيب لاحمد

طز ايمن مصر131

طز التجمع مصر380

الحرية للمعتقلين

يقتل القتيل و يمشي في جنازته

و الناس برضه ساكته

الشخص اللي بتحكي عنه

blue rose

اتصاب نتيجة تعذيب

و بالرغم من كده المفروض ان الحكومة كتر خيرها هتعملوا اشاعة ب 120 جنيه

يا بلاش

البوست ده فكرني بطالب كان المفروض يتخرج سنة 95

و بسبب الاعتقال لسه لحد دلوقت في سنة تالته

هو لسه لحد دلوقت معتقل في سجن في الفيوم و ايام الامتحانات بيترحل عشان يمتحن في الجامعة

كتر خيره الامن سابه يشوف مستقبله

انا عرفت كده لما امتحنته شيت العملي بعد ما امتحن النظري و الشفوي كله في يوم واحد

ماكنش عارف حاجة

و ساعتها طلب مني المخبر اللي معاه اني اساعده

واد كده عنده بتاع 25 سنه عنيه عايزه تدب فيه رصاصة

ابتديت اساعده

الظابط اللي معاه كان و اقف بره

:خرع كده و صوت يجيب الضغط

و النبي خاللي بالك منه يا دكتوره

اخلي بالي ازاي و انا الي حبساه

عجبي

هو انا اللي بسقطه

هو انا اللي مضيعة عمره

و انت تهمتك ايه بقي

رد المخبر

كان عايز يشيل حسني مبارك و يقلب نظام الحكم

رديت انا

طب ما تعتقلو ا الناس كلها بقي

واحد فيهم

البركه فيك يا دكتورة

و احد تاني

بس عارفه انا حفظت اسمك

قصده يلفقي تهمه

طظ فيك

كان نفسي ساعتهااحرقهم

احرق الظابط و اللوا و الاتنين مخبرين

ساعتها ممكن كان يتقال عليا مختله

اقسي جريمة لا يمكن ان تغتفر انك تسرق عمر حد

بس برضه ارجع و اقول احنا اللي نستاهل