الثلاثاء، مايو 16، 2006

جزمة حريمي

مش عارفة انا محرجة اكلم في الموضوع بس خلاص مش قادرة استحمل الحكاية ببساطة ان الجزم انعدمت في البلد الجزم هي المصطلح اللي يطلق علي الحاجة اللي بتلبس في الرجلين و المفروض ان عمرها الافتراضي يعدي الستة اشهر لو مش جزمة بجد او تعدي معاك السنتين لو جزمة بنت جزمة ده كان زمان و زمان ده من اربع سنين
****
من اربع سنين كنت بتبسط كتير لما انزل اشتري جزمة بس الحالة اتغيرت بقي الموضوع ده بيكأبني لاني عارفة اللي هيحصل عارفة ان الجزمة هيحصلها حاجة في اول اسبوع و لو حظي حلو هتعمر شهر مش فارق ان كانت براند او مش براند كله زي بعضه واحد من الشغالين في محل توكيل ودتله جزمة من الجزم بعد عشر ايام بعد امنفصل نعلها و كان رده انها شتوي ماينفعش تتلبس في الصيف و بعدين دي كمان جزمة اسكندراني مش متعودة ع الحر اللي عندنا
****
بوت.. سابو.. جزمة كعب عالي ...كعب واطي.. كله زي بعضه مابيعمرش جربت كل محلات البلد و مافيش فايدة هيجيلي يوم و ماليقيش حد اشتري منه ... لما اشتكيت لواحد من اصحاب المحلات قاللي ما هو لازم عشان تشتري غيرها بيقولها بهزار طبعا
****
اخواتي بقوا يتلامزوا علي ويبصولي اصل انا اللي مش بيعشلي جزم اختي الصغيرة قالتلي ان ممكن نيتي بتبقي وحشة طب انا مستعدة اصلح نيتي بس يعيشوا
****
بدأت افقد الثقة في نفسي.. في مشيتي بقعد ابص لرجليه و أقول يا ربي يمكن رجلي اللي مش مظبوطة بس لا فيه فلات فوت و لا حتي عضمة طالعة يمين و لا شمال طب فين الغلط
****
هذا بمناسبه السابو الجديد اللي اتقطع النهاردة في اول لبسة ع بعد تلات شوارع من بيتنا

4 Comments:

At 8:08 م, Anonymous jane said...

أنا عندي ملاحظة "حذائية" عامة هي إنه فيه ناس بتعيش لها جزم كتير قوي وناس جزمها بتبوز بسرعة جداً.

أنا بأتعب من كل الجزم تقريباً وبأتعور منها لكن عمر ما جزمي بتتقطع أو تتفك لا الرخيصة ولا الغالية، بأرميها من الزهق وبعد ما تتكوم عشر سنين ورا بعض، بينما "ي" لا يعيش معه حذاء أكثر من شهرين في العادي.

حاجة غريبة ولا أعرف لها سبباً

 
At 10:02 م, Blogger beastboy said...

جين عندها حق، بيعتمد على المستخدم، عادة الجزم بتعمر في رجلي وباتخلص منها بعد فترة طويييلة من الزهق ليس إلا، لكن بنتي بتشوط الأرض وهي ماشية فبتبهدل الجزم بتاعتها بعد أول أسبوع. أنت بتمشي تشوطي في الأرض زيها؟؟ ده طبعًا مع الافتراض انك اشتريتي جزمة نوعها حلو ومش نظام السنتر بتاع بطرس غالي اللي في مصر الجديدة، العمر الافتراضي للجزم فيه شهر بالكتير

 
At 2:08 م, Anonymous مختار العزيزي said...

الجزم عادة بتبوظ لما الناس تسئ استخدامها وتلبسها، ولو أساؤا الاستخدام أكثر ومشيوا بيها في الشارع وهمه لابسينها بيبقي الأمل ضعيف جدا ان الجزمة تعيش أكتر من شهر

وجزمك بتبوظ لأنك غالبا بتلبسيها وبتمشي بيها كمان ... عايزين بقي نتعلم نستخدم الحاجة صح ، مش كل حاجة هانقول نظرية مؤامرة من جانب اصحاب المحلات او ارضية الشوارع

 
At 11:43 م, Blogger shaimaa said...

والله مشكلتك دي بتفكري بنفسي

وقصه حياتي وفيلما الكبير وانا والعذاب والجزمه
كل الجزم بتبوظ
كل الجزم بتتقطع
لاومشاء الله قطعات انما ايه
قاتله
بنجيب من الاخر يعني
نشتري الجزمه باليمين ونرميها بالشمال

 

إرسال تعليق

<< Home

Free Web Counter
Free Web Counter

Designed by Little Sesame