الثلاثاء، مايو 15، 2007

نثق في قضائنا

حالة من النشوة انتابتني لحكم القضاء الإداري الصادر الأسبوع الماضي ببطلان قرار رئيس الجمهورية إحالة 34 من قيادات جماعة الإخوان المسلمين إلى المحاكمة العسكرية و استمرت حالة من الفخر طوال الاسبوع كلما اتذاكر الصفعة الموجهه للرئاسة
و اقول يا تري هيعملوا ايه
اكيد مش هينفذوا و اخبطوا راسكم في الحيط
لكن باطل الحكومة ميغلبش وألغت المحكمة الإدارية العليا (المكونة من قضاة منتدوبون) حكم القضاء الإداري
*******
سنظل نقول نثق في قضائنا لا اعرف لمتي..متي تنتهي صلاحية هذا الشعار..

الاثنين، مايو 14، 2007

قمح سام مش مسرطن

ابتكرالاستاذ -هو ليه مش مهندس؟؟- أمين أباظة وزير الزراعة واستصلاح الأراضى اسلوب جديد من أساليب حكومتنا الغراء لاخفاء الحقائق و تزييفها
امس في برنامج القاهرة اليوم اتصل و يا ريته مااتصل و قال كلام كتير كده بمعني ان كل شئ تمام و ماشي زي الساعة و من ضمن اللي قاله ان المصريين و النيابة و وزارة الصحة و البشر كله غلطانين وان مافيش حاجة اسمها قمح مسرطن و ان الناس دي كلها بتفتري علي القمح المستورد و هو يادوب فاسد يعني و ماله لما كل واحد ياكل منه رغيف و لا اتنين لان مادة الافلاتوكسين اللي في القمح دي مادة يادوب سامة و لا سمح الله مش مسرطنة و لا حاجة
************
المذيع اللي مش غلبان يتنطط قدامه و يقوله تقرير النيابة و تقرير المعامل.. و ده ابدا دماغة عاملة زي(....)هي مادة سامة..يعني سامة.. كانه عادي لما المصريين ياكلوا الحاجة الفاسدة انما البهتان انها بتسرطن.. ده افتراء علي القمح
************
انا كمان قاعدة اتشال واتحط....أي طالب في اي كلية ممكن يقول سيادته ان الافلاتوكسين هي مادة مسرطنه ..ابص للموبايل اللي طبعا كالعادة مفضي شحن و عايزة اتصل اشيل من عليه اللبس لان تلاقي سيادته فهم ان أفلا" توكسين" تعني انها لازم مسممة و لو هي كانت مسرطنه كان زمان اسمها افلا "كارسينوجين".. منتهي الذكاء
************
الراجل لما دكتور اتصل بيه -تلاقيه اتنقط زيي- و حاول يفهمه و يشيل من عليه اللبس -الوزير المحترم قعد يقاوح في ان الشعب المصري محتاج ياكل من القمح ده لمدة كبيرة جدا عشان يجيلوا سرطان و عشان كده القمح ده مش مسرطن-نورت المحكمة
************
See Aflatoxin at Medical dictionary which define aflatoxin as a powerful liver carcinogen
مادة مسرطنة للكبد شديدة الفعالية

A Baby

كم الانفعالات التي احسها عندما أري طفلا.. أراقب تحركات يديه كم هي صغيرة و رقيقة بالمقارنة بايدي الكبار..
احب ان اسمعهم يتكلمون بكلامهم الغير مفهوم..احس باصواتهم تطربني..
**************
لا أعرف لما يشتكي زملائي من أطفالهم و لما هم دائمي النصح أن الزواج الناجح السعيد هو الذي بلا أطفال
**************
كل ما اعرفه اني اتابع نمو جنيني منذ ان كان يبلغ الثلاث ميلميترات طولا و اقول يا ربي متي سيبلغ السنتيمترات العشرة..طوله الان هو 25 سنتيمترا..يااااه..... ووزنه 400 جم
**************
The photo for Eman-Lea (French-Egyptian girl, the daughter of my cousin)...So So cute girl

السبت، مايو 12، 2007

كملايين غيري اكاد اوقن ان الاسباب الاقتصادية هي سبب تأخر سن الزواج ربما كانت مفاجأة بالنسبة لي أن هذا السبب يقبع في المركز السابع ربما من اكثر الاسباب الاخري شيوعا هو زيادة عدد النساء علي الرجال.. حتي هذا بدا سببا غير صحيح فاحدي الاحصائيات أظهرت أن عدد الرجال الذين تخطوا سن الخامسة و الثلاثين بدون زواج هو ضعف عدد النساء من نفس الفئة العمرية الحقيقة التي عرفتها صدفة ان السبب الاول هو انحسار بعض القيم مع غلبة القيم الاخري فقد انحسرت قيم الجماعة و المسئوليه و غلبت قيم الفرد و متعته..قكثير من الشباب يرون أن ما الداعي من تحمل مسئولية امرأة بأطفالها و ما الداعي من وجع الدماغ طغت النماذج علي تفكيرنا فاصبحت هي المحركة لتصرفاتنا.. فيوجد نموزج للعريس اللقطة.. غني وسيم ابن ناس كفلان الفلاني في الفيلم العلاني و يوجد دائما نموذج للبنت الامورة الشقية فما الداعي لان اقبل بمن هو اقل من النماذج تظل الفتاه تحلم و تحلم بالفتي الملياردير الوسيم الذي يخطفها في عربته البيضاء الفارهة و يعيشوا في سعادة و هناء و يخلفوا صبيان و بنات تظل تنتظر و تنتظرو في كل مرة تقارن ما بين الواقع و حلمها فتفضل الحلم علي الواقع فما بين شباب بيريحوا دماغهم و ما بين شابات حالمات تتولد المشكلة
************
ربما تبدوا هذه الاسباب منطقية خاصة اذا عرفنا ان نسبة الطلاق في ارتفاع مستمر.. المسأله مش فلوس و لا عدد رجالة اقل من البنات لكن مسألة مسالة فكر و قيم تغيرت اولاوياتها
************
احدي زملائي من زمان كان نفسه يطلع مهندس بترول لكنه احدهم اقنعه انه سيكون من ذوي الدخل العالي (اعتذر لاخي و لاقرانه) لكنه في نفس الوقت لن يستمع بهذا المال و لن يستمتع به الا زوجته و اولاده فصرف نظر عن الكلية
************
من كام سنة كعادتنا انا و اصحابي نموت في توفيق "الروس" في الحلال فحاولنا اننا نجوز زميلنا اللي بحكي عليه بواحدة زميلتنا و بالرغم ان البنت رقيقة جدا و بنت ناس جدا لكنه رفض و قال انها زي اخته.. ربما ساعتها عرفت السبب فهي لا تشبه اي من النماذج لفتاة احلام اي شاب لاتشبه اي واحدة في اي مسلسل ولا في اي فيلم .. لللاسف كانت بنت عادية
************
العهدة في تريتب الاسباب لحديث د. فيروز عمرو لاسلام اوونلاين

Free Web Counter
Free Web Counter

Designed by Little Sesame