قصيت شعري بس مش مبسوطة
انا عايزة اقص شعري
انا عايزة اقص شعري
كل مرة ابص في المرايه أحس اني عايزة حاجة جديدة و افتكرت ان تغيير زي ده ممكن يبسطني
و بعدين الموضوع تحول الي هوس فكان كل مرة احس فيها اني مش مبسوطة اقول هو السبب شعري اللي عايز يتقص
رحت الكوافير و استنيت ساعه و نص عشان الدور من غير ما أعمل حاجة مستنيه اللحظة المرتقبة اللي أقص فيها شعري و ابقي خلاص مبسوطة وجت اللحظة و سألتني
عايزة تقصيه ايه
شرحتلها الافتكاسة اللي عايزة اعملها و استفضت في الشرح
قطعت كلامي و قالت
دجريديه مدور
قلت و ماله مدور مربع المهم يتقص و اتبسط
غسلت لي شعري و انا مبسوطة
مسكت المقص و انا اكتر انباسطا
قصت 15 سم من شعري وأنا ماهتمتش
تك تك تك أصل كنت مستعجله و اتأخرت
خلاص خلصت
روحت البيت و بصيت في المراية
ملت براسي يمين و شمال
مش عارفه ليه حالة الانبساط اللي توقتعها ما حصلتش
قصيت شعري بس مش مبسوطة
كل اللي حصل اني بقيت مخنوقة
***************
ليه حاجات افتكر انها ممكن تبسطني لكن اكتشف انها مابتبسطنيش و كالعادة اقول ياريتني ما عملتها
***************
posted by Little Sesame @ ١٢:٠٠ م
2 comments
2 Comments:
يمكن عشان منال شعرها مش ديجراديه مدور :-)
أولا لو الافتكاسة شبهي يبقى ده معناه أن شكلك بقى حلو جدا جدا و المفروض تنبسطي.
أما الحلاقين(أيوه حتى بتاع الستات حلاق) دول كلهم أشرار و مش ممكن حد يطلع من عندهم مبسوط.
حاجات كتير ممكن نعملها ونفتكر انها هتبسطنا لكن للاسف
زي قص الشعر والجواز
إرسال تعليق
<< Home