الاثنين، أبريل 07، 2008

اتاوة البلطجي الكبير

عشان ايه كل اللي حصل في المحلة من نهب و سرقة و حرايق.. كل ده عشان اللي بيقولوا عليه الاضراب.. يا بلد مش مهم الكام جنيه زيادة في الاسعار..مش مهم الزيت يوصل تمنه الضعف في اقل من شهرين.. مش مهم الناس تموت في طوابير العيش.. ايوة فعلا مش مهم اطلاقا الفقرا تموت من الجوع.. مش مهم الشباب يشتغل... المهم انك تنزل الشارع تشحت و فيه امان في الشارع.. .. الا الامن يا جماعة.. الا الامن و الامان
****
مش مهم تندهس تحت قطبان القطر.. مش مهم القطر يولع و هو ماشي.. مش مهم انه يخبط في سور.. المهم ان الرعاع البلطجية ميوقفوش القطر و يضربوك بالطوب
****
مش فارقة اذا كان اهل المحلة هما اللي عملوا الشغب أو انهم ناس من برة.. ناس مأجورة..ممكن يكونوا نزلوا من المريخ.. مش دي المشكلة.. او ممكن مؤامرة من اسرائيل صدرت لينا بلطجية الشغب زي ما لوثت اكياس الدم و البلازما.. برضه مش هي دي المسئلة
****
المهم ان الدرس وصل يا جماعة و اللي وضع الدرس هو بجد معلم (بكسر الميم) فالفوضي التي حدثت ربما يكون المستفيد الاول منها هو النظام القائم ربما الغرض هوأن ترسخ عند البسطاء من هذا الشعب انها التي تحميه من البلطجية.. تحمي ممتلكاته البسيطة.. بيته.. بقالته.. محل الفول اللي بياكل فيه.. مدرسة العيال.. الكام جهاز الكمبيوتر اللي اصلا مش شغالين.. المهم انها بتحميه بمعني ان الحكاية اشبه ببلطجي كبيرلابس بدلة عسكري بيحمي اهل الحته من البلطجية الصغيريين و يجعلهم يلزمون جحورهم زهاء اتاوة صغيرة أو كبيرة مش فارقة...ايه يعني ستة جنيه زيادة في زجاجة الزيت ولا كام الف جنيه زيادة في طن الحديد.. كله يهون في سبيل الحمي في ظل البلطجي الكبير

Free Web Counter
Free Web Counter

Designed by Little Sesame