الجمعة، يوليو 07، 2006

حاجة تقرف

في الدقائق اللي مش لاقية اعمل فيها حاجة اعمد الي التنقل بين القنوات عدة مرات دون التوقف اكتر من دقيقة علي اي قناة
و بصراحة بدل ما اتبسط و اشوف اي حاجة عدلة.. بتقرف
طبعا مش عايزة اجيب سيرة الفيديو كليبات و الحركات المسخرة و لا الناس اللي كل شوية بتتضايق من هدومها... معلش الدنيا حر
ونغض الطرف برضه عن الرسائل القصيرة في كل القنوات اللي واضح انها من شعوب عايزة الحرق...معلش برضه يا بخت من وفق راسين في الحرام
اللي يغيظ بقي برامج تفسير الاحلام اللي ما شاء الله كالنار في الهشيم واحد في" المحور" و واحد في" الناس"و ما خفي عن عيني كان اكنر
المصيبة ان فيه ناس بتتصل و حاجات غريبة واحدة شافت تعبان و التانية شافت جوزها بيجوز و الراجل الرخم اللي بيفسر يبتسم ابتسامة غبية و يقعد يسألها عن حياتها و في الاخر يفسرلها الحلم علي اساس حكاويها ..دجل في دجل
هي الناس دي فاضية ولا ايه
انا اصلا مش بحلم و لو حتي جه اليوم اللي احلم فيه مش هفكر في الحلم غير تلات ثواني بعد ما اصحي و بعدين انساه
بس تقول ايه في الفضي
خلاص كل حاجة اتحلت و الاشية معدن و مش لاقيين غير احلامنا نفسرها
ربنا ياخدك يا مروان ميلودي انت و شريف صبري و جاد
ربنا ياخدك يا شيخ سيد انت و اللي زيك
*****
اغنية" انا مخطوبة" لواحدة متتسماش اخرجها لها جاد شويري تدل عن تأنيب ضميريحتذي بيه للمطربة ذات الفستان الاحمر
مش عارفة ليه متهيألي انها اصلا مش هتفرق معاها حتي لو كانت مجوزة
يا ميت مرحبا بعيشة اللذاذة

6 Comments:

At 12:23 ص, Blogger ahmad said...

و الله أغنية مخطوبة دي هايلة ... بتعبر عن أحلام ناس كتير منّنا ...

 
At 6:59 م, Blogger Al_King said...

أزال أحد مشرفي المدونة هذا التعليق.

 
At 7:13 م, Blogger Al_King said...

السلام عليكم ورحمة الله و بركاته

أختي الكريمة
لديك الموهبة في النقد وعرض الموضوع بشكل شيق ولكن لي عدة تعليقات علي ما كتبتي, وأرجو أن يتسع صدرك لها:

أولا: تفسير الأحلام من سنن رسول الله عليه الصلاة والسلام, وكون وجود من يتاجر بها أو يدعي أنه أتاه الله العلم والقدرة علي التفسير, لا يعني أنها ليست سنه. كما أن الأحلام وتفسيرها ذكر في القرآن وعلم الله سيدنا يوسف تفسيرها.

ثانيا: كونك لا تحلمي, لا يعني أن بقية الناس لا تستطيع أن تحلم, وطبعا من أوجد هذا المبدأ هو المطرب الكبير وقال "لو بطلنا نحلم نموت, لو عاندنا نقدر نبوظ"

ثالثا: بدلا من الدعاء على المسلمين بأن يأخذهم الله, أدعي الله أن يهديهم جميعا. ومن هدي الرسول عليه الصلاة والسلام, أن المسلم ليس بسباب ولا لعان.

رابعا: أنتي أيضا تساعدي بدون علم علي النشر والدعوة لما تعترضي عليه. يعني ذكرتي
البرامج والقنوات وكان ناقص تقولي بقي مواعيد الإذاعة, وذكرتي أسم الأغنية والمطربة والمخرج وقد تثيري بداخل أي أحد الفضول لرؤية هذه الأغنية. كان يمكنك أن تعترضي علي محتوي الأغنية, أو الهدف من قصتها, دون عمل إعلان مجاني لها.

خامسا: مع احترامي التام لرغبتك في الدعوة للأفضل, لكن هناك نقطة غير منطقية.
وهي, من أين يجد المسلم الذي يرجو عفو ربه الوقت لمتابعة كل هذه البرامج والمرور علي كل هذه القنوات؟؟؟

لو يملك هذا الوقت – الذي سيسأله عنه الله عز وجل فيما أمضاه- فليستخدمه فيما ينفع, مثل تحصيل علوم الدين وقراءة القرآن, أو على الأقل تحصيل علوم الدنيا التي فيها منافع للناس.
وبدلا من أن يلجأ للبحث بالريموت للترفية عن نفسه, يلجأ لكتاب الله, ولو سيتابع فليتابع برنامج فيه منفعة وخير.
"أَيَطْمَعُ كُلُّ امْرِئٍ مِّنْهُمْ أَن يُدْخَلَ جَنَّةَ نَعِيمٍِ"
سورة المعارج آية 38
جزاكي الله خيرا وأسف للإطالة

 
At 1:34 ص, Blogger Eman M said...

مع ايمانى الشديد بالأحلام و تأثيرها على حياتنا، بس عمرى ما أقتنعت بموضوع معنى ظهور تعبان ولا أرنب ولا حتى أسد فى الحلم.
معرفش بقة الكلام دة قد ايه صحيح

 
At 8:39 ص, Anonymous غير معرف said...

والله والله والله اني قرفت من طريقة كلامك يعني حتى قرفانه من حالك عايزة يقرفينا من حاليا ... لكن اللي اقول انا اللي استاهل والا كتاب باين من عنوانه الموضوع مقرف اكيد الكاتب الاستاذة قرف

مع القرافه

 
At 9:45 م, Blogger قلم جاف said...

يستفزني في الشيخ سالم أبو الفتوح مفسر الأحلام على قناة الناس إصراره على أن تفسير الأحلام الذي يقدم عنه برنامجاً ليس حرفة بالنسبة له ، كما لو كان "لا" يتقاضى أجراً عن البرنامج الذي يقدمه!

المحور ، الناس ، أخواتهم ، برامج التوك شو ، هالة سرحان ، صبيان عربية كبدة روزا اليوسف ، العاشرة مساءً ، كلها بقت حاجات تقرف فعلاً..

 

إرسال تعليق

<< Home

Free Web Counter
Free Web Counter

Designed by Little Sesame