هيصلي الفجر و يطير علي دهب

سعادة البيه الريس هيصلي الفجر و يطير علي دهب و بعد كده يروح يسلم ع السياح واحد و احد و يزور الجرحي في المستشفيات

و يكلم مع كل واحد شويه و يعمل انه بيسمعهم كده و كده يعني

يا جماعة اصل مافيس ماتش

و كمان دي فلوسه و فلوس عياله

مش الواجب ياخد باله منها برضه

إن للحريه ثمن

إن للحريه ثمن

حلوة اوي يا عدنان

بس يا ريتنا نفهم

القضاة و ابو الليل

مش عارفة ليه نفسي المريضة و اللي دايما شايفة ان الكوبايه فاضية و ناسيه ان فيه -يا ولداه- نقطة في قعر الكوباية حاسة بقلق و مش مطمنة حالة القلق ده جاتلي لما شفت صورة ابو الليل و انا بقرأ الجرنال و لما لقيت فيه قالب طوب علي قلبي قلت يمكن عشان الراجل شكله يخوف شويه شكله ميديش ايحاء بعدل خالص حسيت كمان ان اسمه مش لايق علي منصبه يعني بالقياس ان ريس الوزرا اسمه نظيف و وزير الداخليه اسمه حبيب و ريسنا اسمه مبارك و شايفين قد ايه احنا "غرقانين" في نظافة اليد و المحبة و البركات يبقي لازم يكون اسم وزير العدل حاجه من دول برضه يعني لو يكون اسمه ابو الاتزان ولا ابو الاستقلال حتي عشان يأكد كمان كلام سيادة الريس "أنه لا يتدخل أبداً بين رجال القضاء مؤكداً أنه يحرص كل الحرص علي استقلال القضاء ومكانة رجاله"

.بس بلاش و حياة ابوك حكاية الليل دي اللي بتحسسني انك طالع من مغارة جبل القبة

ضفيرة و لا ديل حصان

:نظر اليها صاحبنا نظرة طويلة ثم قال .....اتخيلك و انت نائمة بشعرك المنسدل علي وسادتك برموش جفنيك المتعانقتين :هي في نفسها أهو ده الكلام اللي بيخرب البيوت :استجمعت شجاعتها قليلا ثم قالت انا شعري مابيكنش منسدل علي مخدتي :هو يبقي أكيد بتعمليه ضفيرة :هي و لا بعمله ضفيرة و لا حتي ديل حصان :هو ااااااااااامال ايه :هي كادت ان تقول انا بسرحه و انام باقوم الصبح الاقيه متلعبك و كل خصلة في حته بقوم و انا عينيه مقفلة و يادوب بفتح نص عين عشان اشوف الباب فين بغسل وشي و لسه شعري منكوش و احط الشاي ع النار و هو لسة ماتسرحش بافطر و اشرب الشاي و انا لسه قافلة عينيه و لسه شعري منكوش اجيب لبسي من الدولاب و البس و بعد ماخلص و يادوب لسه نازله بسرح شعري يعني يابني لا فيه انسدال و لا ضفيره نايمه ع المخدة و لا حاجه ياريت متخربش علي نفسك :هي انا بعمله كحكة

البلوزة قصيرة

انت مش حرانة- حرانة اوي- طب اقلعي الجاكت-

لا... اصل البلوزة قصيرة-

شهادة من شاهد عيان في أحداث الأسكندرية

شهادة من شاهد عيان في أحداث الأسكندرية

خمسة و أربعين

أخ تالت لينا

لا تملك الا ان تبكي و انت تقرأهما

لا تكاد تصدق ان كرها كهذا موجه اليك (كمسلم) و انت ليس لك من الذنب الا ان الجميع لم يقف ليفكر لماذا؟

لمصلحة من تأجيج المشاعر هل فعلا لعبة من ألعاب الحكومة؟؟

هل يمكن ان تتحول علاقتي بزميلي الوحيد المسيحي لشئ من هذا

هل يضحك في وجهي كل صباح و داخله شيء اخر غير مشاعر المودة

هل أدمن مثل غيره من ابناء طائفته الاحساس بأنه مضطهد

ثم من هو غير المضطهد في هذه الدولة

ان الحريه لا تتجزأ

ليكن المواطنان نصحي جرجس و مصطفى مشغل أول الشهداء

في معركة الحرية للجميع

و لا لاضطهاد المصريين

*******************************

اتنين بيتخانقوا على االارض التي يشتركان في ملكيتها , و لا ينتبهان الى ان الارض بتتنهب و هم عنها و عن الحرامي مشغولين بخناقهم

أساتذة الجامعات يهددون بالإضراب ويتهمون الحكومة بتهيئة الأجواء لتمديد الطوارئ

مصطفي الفقي للجزيرة امبارح: حادث الاسكندرية عكر صفو المصريين مسلمين و اقباط

لاول مرة لقيت الراجل عنده حق

لاني صحيت الصبح لقيت الصفو بتاعي مش متظبط

و لقيت اخويا برضه صفوه فيه حاجه

بس اكيد مش من الزهق و القعدة من غير شغل

و مش عشان الوزير بتاع البترول مشغول بالكورة و نادي انبي و عمرو زكي بتاع عزبه الشحاتين اكتر من تعيينهم

و ركبت التاكسي لقيت السواق الصفو بتاعه مش في محله

اكيد برضه مش عشان المخالفة اللي خدها من غير ما يعمل حاجة

رحت الشغل برضه لقيت الناس كلها صفوها بايز

اكيد برضه مش عشان الخصومات و لا عدم وجود سياسة واضحة وان كل حاجة بظروفها

!جبت التايهة يا سيادة النائب

تفتكر مين بيحب التاني اكتر

نظر الي نظرة وانا ملخومة في اكل الشيكولاتة التي احضرها لي ثم قال انا بحبك قوي لم أرد ربما ابتسمت و اكملت اكل الشيكولاتة انت عارفة بحبك قد ايه اكتر من الدنيا و ما فيها توقفت عن اكل الشيكولاتة و نظرت في عينيه و قلت انت عارف... انا بحبك اكتر من الشيكولاتة قلب شفتيه امتعاضا و قال بس لمعت عيناي و قلت اه بس بحبك اكتر من الشيكولاتة واكتر من الطعم البارد لحبات النعناع علي لساني في نهار صيف و من الطعم الدافي لشاي الصبح ايام الشتا بحبك اكتر من حاجات بسيطة لكني فعلا بحبها بحبك اكتر من نسيم الليل لما يطير شعري واكتر من شمس الشتا لما تدفيني و اكتر من ريحة تراب الشوارع بعد المطر

بحبك اكتر من حاجات بسيطة لكني فعلا بحبها بحبك اكتر من رغاوي الصابون و اكتر من الدش البارد في عز الحر واكتر من الدش الدافي في ليل الشتا بحبك اكتر من حاجات بسيطة لكني فعلا بحبها بحبك اكتر من بيجامتي الموف و اكتر من سريري و اكتر من مخدتي اللي طرزتها بايدي بحبك اكتر من حاجات بسيطة لكني فعلا بحبها بحبك اكتر من النوم و اكتر من السهر و اكتر من غفوة عينيه في لحظة وسن بحبك اكتر من حاجات بسيطة لكني فعلا بحبها بحبك اكتر من شغلي و اكتر من كتبي و اكتر من قلمي الرصاص اللي برسم بيه بحبك اكتر من حاجات بسيطة لكني فعلا بحبها بحبك اكتر من سمر و اكتر من سلمي و اكتر من احمد أخويا بحبك اكتر من ناس بسيطة لكني فعلا بحبهم تفتكر مين بيحب التاني اكتر

لا أريد أن اكون حبيبتك

لا أريد أن اكون حبيبتك كل ما أريده أن تسمعني بانصات وأسمعك أن نحتسي قهوتنا سويا في مكتبي أو في مكتبك نعم ان كل ما أريده منك أن أكون صديقتك

أيها الواعظ

أيها الواعظ ذو الوجه البشوش القائل بكلام الله و الرسول اني لا أثق بك فانك لا تعمل بما تقول فعند بابي يكفهر وجهك و يتشدد الكلام من غير سبب هل اقترفت ذنبا فتقسو علي دوما ان الاثم ليس بطبعي فلما تعبس في وجهي لما تكفرني و تسخر مني لما تسفرني هل تكفرني لتظهر ايمانك هل تسخر مني لتبين كمالك هل تحجبني لتخفي عارك هل تستحل سفك دمي في سبيل جنانك ما جنيته بحق ربك اني فقط لست ابنك

لكني ابنتك

قصيت شعري بس مش مبسوطة

انا عايزة اقص شعري انا عايزة اقص شعري كل مرة ابص في المرايه أحس اني عايزة حاجة جديدة و افتكرت ان تغيير زي ده ممكن يبسطني و بعدين الموضوع تحول الي هوس فكان كل مرة احس فيها اني مش مبسوطة اقول هو السبب شعري اللي عايز يتقص رحت الكوافير و استنيت ساعه و نص عشان الدور من غير ما أعمل حاجة مستنيه اللحظة المرتقبة اللي أقص فيها شعري و ابقي خلاص مبسوطة وجت اللحظة و سألتني عايزة تقصيه ايه شرحتلها الافتكاسة اللي عايزة اعملها و استفضت في الشرح قطعت كلامي و قالت دجريديه مدور قلت و ماله مدور مربع المهم يتقص و اتبسط غسلت لي شعري و انا مبسوطة مسكت المقص و انا اكتر انباسطا قصت 15 سم من شعري وأنا ماهتمتش تك تك تك أصل كنت مستعجله و اتأخرت خلاص خلصت روحت البيت و بصيت في المراية ملت براسي يمين و شمال

مش عارفه ليه حالة الانبساط اللي توقتعها ما حصلتش قصيت شعري بس مش مبسوطة كل اللي حصل اني بقيت مخنوقة

***************

ليه حاجات افتكر انها ممكن تبسطني لكن اكتشف انها مابتبسطنيش و كالعادة اقول ياريتني ما عملتها

***************

الافتكاسة اللي عملتها بتفكرني بحد مين مين اه شعر علاء كل مابص لشعري في المرايه افتكر علاء خلاص بقي الموضوع ارتباط شرطي طب ليه مش منال طب ليه مش حد تاني لزقت هو علاء

انا صباعي دوحس يا عمرو

" انا صباعي دوحس يا عمرو " فاطمة احدي مشاهدات القاهرة اليوم في اتصال تليفوني مع عمرو اديب فاطمة عملت اكتر من 4000 تصويت لهاني في الاخر راحوا لجوزيف سلامة صباعك يا فاطمة هانم قد ايه انت مواطنة بتحب مصر ضحيت بصباعك اللي دوحس من كتر الفوتنج يارب كدة يكتر من امثالك و يحفظك زخرا لمصرنا الحبيبة مصر البنات الشقر و هاني اللي بيغني إنجليزي و فرنساوي مصر الزمالك و مصر الجديدة و مارينا مصر روتاري و نادي العاصمة مصر عزبة سيدنا الريس كنت فين ياهانم احنا كنا مستنيينك من زمان

انا مش وش نعمة

محمد انا اسفة انا عاشقة صورة في خيالي ياريت قلبي كان في دماغي

و ياريت خيالي كان ع الارض

ليلة سقوط بغداد

هل مرت هذه الليله كغيرها لقد نسيت التاريخ لكنني لم انسي العنوان لم تمر ككل الليالي ليلة ساكنة سكون الموتي لا تبعث الا علي النوم من الملل ربما لم اصاب بعدها ببرودا جنسيا و من الذي يجد لذة الرغبة او حتي لذة التفكير

بصراحة مين اللي كان ليه نفس الموضوع يجي ع باله مع الاعتذار للفيلم

فقط لم يغمض لي جفن لقد ظللت اتقلب في فراشي حتي الاذان فراشى الذي أضحي كالجمر المتقد انفاسي تتسارع الافكار تتلاحق في رأسي الصرخات تدوي في أذني قمت من فراشي و علي الضوء الخافت القادم من الخارج بحثت عن ورقة بيضاء علي المكتب و تحسست يدي قلم و رجعت الي الفراش و علي ضوء الموبايل حاولت ان اخط الكلمات التي تختلج في عقلي بعد سنين من هذه الليلة لازلت احتفظ بالورقة بسطورها المتداخلة بكلماتها المبهمه فقد كتبتها علي ضوء موبايل في ليلة كئيبة *******

التاريخ: نسيت كتابته النص الاصلي: في ليلة اليوم الخامس للحرب فشلت في جلب النعاس لعيني برغم ان الجو بدا هادئا لا اسمع الا اصوات الديكة تصيح تمتمت شفتاي بدعاء النوم و برغم ذلك ظلت عيناي (مفتحلتان؟)، لجأت الي الطريقة الشهيرة بعد خراف بيضاء تقفز من فوق سور صغير لم (...؟؟) ثم لجأت أن اغير من (؟؟؟؟) الخرفان و اعد القنابل التي تسقط علي بغداد او اعد عدد من ماتوا و ربما انخرطت في العد ربما(؟؟؟؟؟) قلبي ذلك يثيرني لاختار شيئا اخر مثلا هل اعدد عدد الحكام الذين تواطئوا مع امريكا ربما هذا ايضا له شيء من الاثارة ها هي اصوات المساجد تستعد للصلاه لقد أشرفنا علي ميعاد (الا؟؟؟) لم استطع النوم بعد رباه ان غدا يوم عمل شاق رباه رحماك رباه رحماك

تشربي ايه

اللي حصل

هو: تشربي ايه

انا: اممممم ...عصير

هو: جرسون.... عندك عصاير ايه

الجرسون: مانجة فراولة لمون

هو : طب اتنين عصير مانجة

المفروض يحصل

هو: تشربي ايه

انا: اممممم ...عصير

هو: جرسون.... عندك عصاير ايه

الجرسون: مانجة فراولة لمون

هو : تشربي ايه انا: مانجة هو : طب اتنين عصير مانجة